“Tempu miu e tia…”- Poesia di Jerry Scalici

Poesia : Tempu miu e tia…
—————————
di Jerry Scalici

Paisi miu,
m’affacciu a la finestra da me casuzza e tutta ti talìu:
passanu l’iorna e pari quasi chi lu cielu e li stidduzzi chiangirrisu pirchì
adaciu adaciu, li genti s’alluntanu di tia.

Na staziunedda firrata tu avìa:
genti acchianava, avutra scinnìa…
picciotti travagghiaturi, zappaturi,
matri di famiglia cu appresso quarchi buttiglia di
sucu, vinu e d’ogni mercanzia.

Genti carichi di stanchizza ma di tanta spiranza
acchianava nna du fumusu trenu,
chi lentu scinnìa e acchianava versu Castidduvitranu o Agrigentu.

Ora sta staziuni
è tristi e sula:
ricordi di genti chi un ci su cchiu,
di stori persi e di munni pirduti.

Lestu e tradisturi é u tempu,
cchiu du lampu chi un aspetta tronu,
tempu chi curri e a nuddu pensa;
tempu chi veni e ti scappa di manu…

Paisi miu,
adaciu, adaciu, adaciu, adaciu,
iu ti baciu:
u travagghiu scarsìa e accussì,
cu cori ruttu e chinu di nostalgia,
m’alluntanu di tia…